მე ვცხოვრობ თბილისში, იმ ქვეყნის დედაქალაქში, რომელიც თანამედროვე ტენდენციებისა და ანტიკური ისტორიის უსაინტერესოესი ნაზავია; იქ, სადაც ევროპა და აზია ერთმანეთს ხვდება და იკვეთება ალი და ნინოს ქანდაკებასავით; ქვეყანაში, რომელმაც საუკუნეების მანძილზე უუგემრიელესი სამზარეულო და ქარვისფერი ღვინო შექმნა.

ჩემმა მოგზაურობისადმი და ახალი კულტურების, ტრადიციების, უცხო ხალხთა ჩვევების აღმოჩენისადმი სიყვარულმა საბოლოოდ მიმიყვანა იმ აზრამდე, რომ მინდა ჩემი ცხოვრების უდიდეს ნაწილს მოგზაურობა შეადგენდეს. ამიტომაც, 2017 წლიდან კარიერის არც ისე რადიკალური, მაგრამ მაინც ცვლილება გადავწყვიტე და ჟურნალისტობიდან ფრილანსერ მოგზაურ ბლოგერობაზე გადავედი.

„წითელქუდას დღიური“ – ეს ბლოგსივრცე შევქმენი, რათა მარტივად გამეზიარებინა ჩემი გამოცდლებები მოგზაურობისას, ამბები, პრაქტიკული და სასარგებლო ინფორმაცია, პატარ-პატარა ეშმაკობები და რაც ყველაზე მთავარია, შენი შთაგონებისთვის, რომ იმოგზაურო ძალიან ბევრი ამ გასაოცარ დედამიწაზე რაც შეიძლება იაფად.

ამავე გზაზე მოგზაურობისას შემომხვდა ოთო, რომელიც დიდი სიყვარულითა და თანადგომით აგრძელებს გზას ჩემთან ერთად, მიღებს სურათებს და მეხმარება მოგზაურობების დაგეგმვასა და ბლოგის მართვაში.