fbpx
ხორვატია

ტოპ 7 რამ, რაც შეგიძლია გააკეთო კუნძულ კორჩულაზე

უნძული კორჩულა კულტურული და ბუნებრივი მემკვიდრეობის ერთ დიდ მთლიანობას წარმოადგენს, მაგრამ მისი მთავარი საგანძური მაინც ქალაქი კორჩულაა. ლეგენდის მიხედვით, კორჩულა აღმოაჩინა ტროადან გამოქცეულმა ბერძენმა გმირმა ანტენორმა. აქედან გამომდინარე, კორჩულას ძველი ქალაქი ერთ-ერთი საუკეთესო მაგალითია ციხე-სიმაგრის ტიპის შუასაუკუნეების ხმელთაშუაზღვისპირული დასახლების და მას ადგილობრივებიც და დამთვალიერებლებიც ხშირად ,,მინი დუბროვნიკს“ ეძახიან.

როგორ მოხვდე კუნძულ კორჩულაზე

ოქტომბერში დუბროვნიკიდან კორჩულაში ბორანი გადის 16:00-ზე და 120 კუნა ღირს = 48₾

აქ მოხვედრა სულაც არ არის რთული. დუბროვნიკიდან, ჰვარიდან, ბრაჩიდან და სპლიტიდან საკმაოდ ხშირად დადიან სამგზავრო და მანქანის გადამტანი ბორნები.

რადგან ჩვენ ჩვენი ხორვატიული მოგზაურობა დუბროვნიკიდან დავიწყეთ, ამიტომ კორჩულაშიც სწორედ ამ ქალაქიდან მოვხვდით. თუმცა, გასათვალისწინებელია რომ არასეზონსა და სეზონის მიწურულს საბორნე ხაზები ლიმიტირებულია. ზაფხულსა და გადატვირთულ სეზონზე უფრო აქტიურია მიმოსვლა.

რა ვნახოთ კორჩულაზე

თუ სანაპიროზე არ აპირებ მთელი დღის გატარებას და გირჩევნია კულტურული სანახაობების დათვალიერება, ქალაქში ძალიან ბევრი ღირსშესანიშნავი ძეგლი, მუზეუმი და ფილაქნებით მოკირწყლული ქუჩებია.

ქალაქში აუცილებლად კარიბჭიდან შეაბიჯე

Things to do in Korcula

ქალაქის მთავარი შესასვლელი მე-17 საუკუნის კიბეებისა და დიდებული მე-14 საუკუნის რაველინის კოშკის ერთიანობას წარმოადგენს. ქალაქი მე-13 საუკუნის ქვის გალავნითაა შემოსაზღვრული.

ესტუმრე მარკო პოლოს სახლსა და მუზეუმს

მე-13 საუკუნის უდიდესი მოგზაური მარკო პოლო სწორედ კორჩულადან იყო წარმოშობით. ამიტო აქ შეგიძლია ეწვიო მის სახლს, მუზეუმს და სხვადასხვა სუვენირების მაღაზიებს, სადაც მარკო პოლოსთან დაკავშირებულ უამრავ რამეს გადააწყდები.

მუზეუმი თანაბრად საინტერესოა დიდებისთვის და პატარებისთვის. ოთახიდან ოთახში გადადიხარ და თითქოს მარკო პოლოს ცხოვრებას “გაივლი”. საინფორმაციო დაფები კი ძალიან საინტერესო და ამომწურავ ინფორმაციას გაწვდიან მის შესახებ.

ფასი: სახლი – 20 კუნა = 8₾; მუზეუმი – 69 კუნა = 28₾

მოიარე პიაცეტას მოედანი

ეს მოედანი ძველი ქალაქის ცენტრალური მოედანია. აქ შეგიძლია დატკბე მე-15 საუკუნეში იტალიელი და ადგილობრივი ოსტატების მიერ, კორჩულას კირქვით აშენებული წმ. მარკის კათედრალით. კათედრალში კი დაგხვდება ტინტორეტოსა და თანამედროვე, ცნობილი ხორვატიელი მოქანდაკეების ნამუშევრები.

დატკბი პანორამული ხედით

აუცილებლად უნდა ახვიდე სამრეკლოზე ადრიატიკის ზღვისა და წითელ სახურავებიანი ქალაქის ხედისთვის. სამრეკლოს კიბეები იმდენად ვიწროა, რომ მოძრაობის დასარეგულირებლად შუქნიშანი აყენია, რომელიც მიგითითებს, უნდა დაიწყო ასვლა თუ არა. კიბე საკმაოდ დახვეულია და მოემზადე ოდნავი თავბრუხვევისა და გულისრევის შეგრძნებისთვის.

ფასი: 20 კუნა = 8₾

უყურე ადგილობრივ ცეკვებს

კორჩულას ყველაზე ცნობილ ტრადიციას ხმლებით ცეკვა “მორესკა” წარმოადგენს. ძალიან დახვეწილი ქორეოგრაფიული ილეთებით აგებული ცეკვა ნამდვილი ხმლებით, პირველად მე-13 საუკუნეში გამოჩნდა ესპანეთში და სწორედ აქედან გავრცელდა მთელს ხმელთაშუაზღვისპირეთში.

შეუერთდი ნახევრად-წყალქვეშა ნავის ტურს (ან არ შეუართდე)

ზოგადად, მე საკმაოდ სკეპტიკურად ვარ განწყობილი მსგავსი ტურებისადმი, მაგრამ ოთოს უნდოდა და მეც დავთანხმდი იმ აზრით, რომ შეიძლება მართლაც გვენახა რაიმე საინტერესო. ვერ გეტყვით, ცუდი დრო იყო საამისოდ თუ ეს ყოველთვის ასე ხდება, მაგრამ ერთი თევზი ძლივს დავინახეთ… თუმცა ბევრი წყალქვეშა მცენარე ვნახეთ, თუკი ეს რამის ნახვას ნიშნავს 😊

ფასი: 90 კუნა = 36₾

დალიე ადგილობრივი ცნობილი ღვინო გრკი

აუცილებლად გასინჯე ადგილობრივი ღვინო გრკი. ყურძნის ეს სახეობა მოჰყავთ ქვიშიან ნიადაგზე, ამავე კუნძულზე, ქალაქ ლუმბარდაში, სადაც ის ყველაზე უკეთ ხარობს.

,,გრკ“ ხორვატიულად მწარეს ნიშნავს, თუმცა ღვინო არის თეთრი და მშრალი. საკმაოდ მაღალი მჟავიანობა აქვს და წიწვის გემო დაჰკრავს.

კორჩულა ფოტოებში

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

This site uses Akismet to reduce spam. Learn how your comment data is processed.